घना जंगल, डरलाग्दा भिरपाखा र हिमालसम्म पुग्ने एउटा गोठालो । लमजुङको क्व्होलासोथार गाउँपालिका वडा नम्बर ३ खगुमको भित्रि जंगलको कुनामा रहेको यो गोठमा श्री प्रसाद सुवेदी एक्लै भने छैनन् । उनकी श्रीमती पनि साथै छिन् । आसपास अरु दुई वटा गोठ पनि छन् । भैंसीलाई जिन्दगी सुम्पेका ५९ वर्षीय श्रीप्रसादको जिम्मामा हाल ७० वटा भैंसी छन् । साना पाडापाडी बाहेक सबै भैंसी फुकुवा हुन् । जंगलमा चर्छन्, जंगलमै बस्छन् । लैना भैंसी बिहानीपख पाडापाडी भएको गोठनेर आइपुग्छन् । उनले जस्तै भैंसीले पनि श्रीप्रसादलाई चिनेका छन् । उनले सबै भैंसीको नाम समेत राखेका छन्
६९ वटा भैंसी आसपासका गाउँका १६ जनाका हुन् । श्री प्रसादको निजी एउटा मात्रै छ । भैंसी रेखदेख गरेवापत त्यसको दूध गोठालोले नै उपभोग गर्न पाउने शर्तमा लमजुङ, कास्की, लगायतका पहाडी र हिमाली जिल्लामा गोठालो राखेर यस्ता घुम्ती गोठ चलाउने प्रचलन पुरानो हो । तर, यो चलन घट्दो छ । कुन गाउँका धनीको कति वटा भैंसी छ भन्ने कन्ठस्त हुन्छ गोठालोलाई । बिहानको ६ बज्यो । जंगल, पाखा पखेरातिर चर्न गएका लैना भैंसी पाडापाडी खोज्दै श्री प्रसाद बसेको गोठतिर आउँछन् । कतिलाई खोज्न जंगलतिरै जानुपर्छ । साढे ६ बज्दा नबज्दै नहुँदै १७ वटा लेकाली भैंसी दुहेर सक्छन् उनले । श्री प्रसादको लालनपालन गोठमै भयो । उनका बुबा पनि उनी जस्तै भैंसी गोठालो थिए । भैंसी गोठमा हुर्किएका उनले अक्षर चिन्ने अवसर पाएनन् । त्यसैले उनी बाहिरी दुनियाँबाट निकै पर छन् । आफू लमजुङको यो पाखो छोडेर बाहिर कतै नगएको उनको दावी छ ।
सानैबाट भैंसीको स्याहार सुसारमा लागेका श्री प्रसाद १५ वर्षको छँदाबाटै सिंगै गोठ धान्ने भैंसी गोठालो बने । त्यसपछि भैंसी नै उनको जीवनको कर्म बन्दै गयो । उनलाई आफ्नो कामसँग प्रेम छ, आफ्नै पाखुरामा विश्वास छ । भैंसीका पाडापाडी स्याहार्नै पर्यो । उनले गोठ मुन्तिर बाख्रा पनि पालेका छन् । फुकुवा भैंसीको रेखदेख बाहेक पाडापाडी र बाख्राको स्याहारसुसारमा खट्नुपर्ने भएकाले पनि उनी व्यस्त नै हुन्छन् ।जंगल, पाखा पखेरातिर चर्न गएका भैंसी खोज्न जाँदा कहिलेकाँही बाघ समेत फेला परेको उनको अनुभव छ । बाघ देखा परे के गर्ने ? भिडियोमा सुनौं श्रीप्रसाद के भन्छन् । ठूला भैंसीलाई आँट्न नसकेपनि बाघले साना पाडापाडीलाई सोझै मार्न खोज्छ । झण्ठै पाँच दशक बस्तुभाउ र गोठसँग मितेरी गाँसेका श्री प्रसाद यस्ता घटनासँग परिचित छन् । त्यसैले उनले बाघसँग पनि लड्न सक्ने जनविश्वास रहेको भोटे कुकुर पनि पालेका छन् । यस्ता भोटेकुकुर निकै चनाखा हुने गर्छन् । जंगली जनावर र अपरिचित मानिस देखे भुक्न थालिहाल्छन् ।बाकी हेर्नुहोस भिडियोमा :
