प्रतिनिधि सभाको हिउँदे अधिवेशन आजदेखि शुरु हुँदै
२२ माघ, काठमाडौं । प्रतिनिधि सभाको हिउँदे अधिवेशन आज (सोमबार) देखि शुरु हुने भएको छ ।
नयाँ बानेश्वरस्थित संघीय संसद भवनमा सोमबार दिउँसो ४ बजे बैठक बस्ने संसद सचिवालयले जनाएको हो । बैठक ढिलो बोलाइएका कारण शीर्ष नेताहरुको सोमबार सम्बोधन नगरी २४ गतेको बैठकमा सम्बोधन गर्ने तयारी भएको छ । यद्यपी संसद बैठकको कार्यसूची भने कार्य व्यवस्था परामर्श समितिको बैठकले तय गर्ने छ ।
यद्यपी सोमबार पहिलो दिनको बैठकमा सभामुख देवराज घिमिरेले राष्ट्रपतिबाट प्राप्त अधिवेशन आह्वान सम्बन्धी पत्रको व्यहोरा पढेर सुनाउने कार्यसूची रहेको हो । बैठकमा सभामुख घिमिरेले राष्ट्रपतिको कार्यालयबाट प्राप्त कार्यभार तोकिएको सम्बन्धी पत्रको व्यहोरा पढेर सुनाउनु भएको हो ।
बैठकमा उहाँले प्रतिनिधिसभा नियमावली, २०७९ सालको नियम १० बमोजिम बैठकको अध्यक्षता गर्न सदस्यहरुको मनोनयन गर्ने सम्भावित कार्यसूची समेत रहेको छ । बैठकमा राष्ट्रियसभामा उत्पत्ति भएको विद्युतीय व्यापार विधेयक, २०८० र राष्ट्रिय मर्यादासम्बन्धी विधेयक, २०७९ का सम्बन्धमा राष्ट्रिय सभाबाट प्राप्त सन्देशसहितको विधेयक टेबुल गरिने भएको हो ।
बैठकमा अर्थमन्त्री डा. प्रकाशशरण महतले आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, २०८० पेश गर्ने र त्यसैगरी, कानून, न्याय तथा संसदीय मामिलामन्त्री धनराज गुरुङले मन्त्रिपरिषदको निर्णयबाट जारी भएको बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन, २०७१ को दफा ४२ बमोजिमको बाधा अड्काउ -फुकाउ आदेश सदनमा पेश गर्नु हुने सम्भावित कार्यसूची रहेको हो ।
हिउँद सकिनै लाग्दा बल्ल शुरु हुन लागको हिउँदे अधिवेशनमा थुप्रै विचाराधीन विधेयकहरु पेश हुने अपेक्षा गरिएको छ । करिब ४० वटा विधेयक विभिन्न समितिहरुमा अल्झिएका छन् । संसद सचिवालयले पहिलो पटक संसद क्यालेण्डर समेत बनाएर कार्यान्वयन गर्ने तयारी गरेको हो ।
यसैबीच, सभामुख घिमिरेले राज्यलाई आवश्यक परेका विधेयकमाथि छलफल गरेर पारित गर्नुपर्ने बताउनुभएको छ । हिउँदे अधिवेशनको पूर्वसन्ध्यामा आइतबार संसद भवनको अवलोकनपछि संचारकर्मीहसंग उहाँले विधेयक पारित गर्नु मात्रै ठूलो कुरा होइन भन्दै पारित गरिने विधेयकहरुको कार्यान्वयन सुनिश्चित हुनुपर्ने बताउनुभएको हो ।
सभामुख घिमिरेले संसद सचिवालयले तयार पारेको क्यालेण्डर अनुसार नै संसद बैठक चलाउने प्रयास गर्ने पनि बताउनुभएको छ । हिउँदे अधिवेशनमा संसदलाई कामको कमी नहुने विश्वास रहेको पनि उहाँले बताउनुभयो । यता संसदमा प्रतिनिधित्व गर्ने विभिन्न दलहरुले पनि सोमबारदेखि शुरु हुने हिउँदे अधिवेशनमा कसरी प्रस्तुत हुने भन्ने तयारी गरेका छन् ।
नेपाली काँग्रेसकी सचेतक सुशिला थिङले आगामी अधिवेशनको संक्रमणकालीन न्याय सम्बन्धि विधेयक र सम्पति शुद्धिकरण सम्बन्धी विधेयक पेश हुने दावी गर्नुभएको हो । अन्य विधेयकहरु पनि आवश्यकताको आधारमा आउने र सरकारले कति विधेयकहरु ल्याउँछ त्यसको पार्टीभित्र समेत छलफल हुने सचेतक थिङले बताउनुभयो ।
यस्तै, नेकपा माओवादी केन्द्रका प्रमुख सचेतक हितराज पाण्डेले आगामी अधिवेशन व्यवस्थित र विधेयक केन्द्रित बनाउने गरी तयारी गरेको बताउनुभएको छ । संक्रमणकालीन न्याय, विद्यालय शिक्षा र निजामती कर्मचारी लगायतका विधेयक अघि बढाउने उहाँले बताउनुभएको हो।
यसैगरी, प्रमुख प्रतिपक्षी नेकपा एमालेका प्रमुख सचेतक पदम गिरीले सुशासनलाई आफूहरुले पहिलो मुद्दा बनाउने बताउनु भएको छ । देशको विकास, सुशासन, समृद्धिको सवालमा एमालेले सशक्त ढंगले आवाज उठाउने भन्दै उहाँले बढी भन्दा बढी ऐन र कानूनहरु निर्माण गर्न केन्द्रित हुने बताउनुभएको हो।
यस्तै, जनमत पार्टीका प्रवक्ता शरद सिंहले भने सत्तारुढ दलहरुले सहमति पालना नगरेको गुनासो गर्नुभएको छ । संसदको वर्षे अधिवेशनबाट एउटा मात्रै विधेयक पारित भएको थियो । सरकारले विजनेस दिन नसक्दा लामो समयसम्म संसद बैठक शून्य समयको भरमा चलेको थियो ।