काठमाडौं । नेपाली कांग्रेसको महासमिति सदस्यहरुको आमनिर्वाचन अघि गठबन्धन गर्ने कि नगर्ने भन्ने विषयमा मत बाझिएको छ ।

कांग्रेसको सोमबारदेखि जारी महासमिति बैठकमा बोल्दै महासमिति सदस्यहरुले आमनिर्वाचनपूर्व गठबन्धनको पक्ष र विपक्षमा आफ्नो मतहरु राखेका हुन् । महामन्त्री गगन कुमार थापाले सांगठनिक प्रतिवेदन पेश गर्दै आगामी आमनिर्वाचन अघि गठबन्धन गर्नु नहुने प्रस्ताव गरेसँगै महासमिति सदस्यहरु यसको पक्ष र विपक्षमा विभक्त भएका छन् ।

महासमिति बैठक स्थलमा सञ्चारकर्मीसँग संक्षिप्त कुरा गर्दै कांग्रेसका नेता तथा स्वास्थ्य तथा जनसंख्यामन्त्री मोहनबहादुर बस्नेतले अहिले गठबन्धनको सम्बन्धमा निर्णय गर्ने बेला नभएको बताउनुभयो । उहाँले आगामी निर्वाचनमा बिरोधीहरु एकै ठाउँमा उभिएमा कांग्रेसले विरोधीहरुलाई फुटाउन गठबन्धन गर्नुपर्ने हुन सक्ने बताउनुभएको छ । तत्कालिन अवस्थामा भर पर्ने र निर्वाचनमा एक्लै लड्ने मानसिकताका साथ काम गर्नुपर्ने उहाँको भनाइ थियो ।

सञ्चारकर्मीसँग कुरा गर्दै नेता रामहरी खतिवडाले अहिले गठबन्धनको विषयमा बोल्नु बेमौसमको बाजा भएको भनि धेरै महासमिति सदस्यहरुले टिप्पणी गर्नुभएको बताउनुभयो । देशको अर्थनीति जनतामैत्री हुनुपर्ने र देशमा लगानीको वातावरण बनाउनु पर्नेमा जोड दिएर पनि कुरा उठिरहेको उहाँले जानकारी गराउनुभएको हो ।

नेपाल प्रेस युनियनका अध्यक्ष शिव लम्सालले आगामी दिनमा गठबन्धन आवश्यक छैन भन्नेको संख्या ठूलो रहेको बताउनुभयो । उहाँले पार्टी विधान अनुरुप नचलेको कुरालाई पनि बैठकमा प्राथमिकताका साथ उठाइएको बताउनुभएको हो । महासमिति बैठकमा उपस्थितहरुलाई ४ समूहमा विभाजन गरि महासमिति सदस्यहरुलाई आफ्नो कुरा राख्न दिइएको छ ।

त्यस्तै, नेपाल महिला संघकी अध्यक्ष उषा मिश्रले महासमितिको बैठकमा भूइँमान्छेका आवाज सुनिनुपर्ने बताउनुभयो । जनतालाई आशाको सन्देश दिनुपर्ने उहाँले बताउनुभएको छ । सबै समावेशिताका मुद्दाहरु महासमितिले उठाउन सक्नुपर्ने उहाँले बताउनुभयो ।

महासमितिको बैठक आफैंमा गर्वको विषय भएको बताउदै महासमितिले कांग्रेस र जनतामा उत्साह जगाउन सक्नुपर्ने अध्यक्ष मिश्रको भनाइ थियो ।