बेइजिङ, कात्तिक ३ गते । चीनले अमेरिकाको राष्ट्रिय सुरक्षा एजेन्सी (एनएसए) माथि आफ्नो राष्ट्रिय समय सेवा केन्द्रमा साइबर आक्रमण गरेको आरोप लगाएको छ। चीनको राज्य सुरक्षा मन्त्रालयले आइतबार सार्वजनिक गरेको वक्तव्यमा एनएसएले सन् २०२२ मा विदेशी मोबाइल फोन सेवाको कमजोरी प्रयोग गरी केन्द्रका कर्मचारीहरूको उपकरणमार्फत संवेदनशील सूचना चोरी गरेको दाबी गरिएको छ।
मन्त्रालयका अनुसार अमेरिकी एजेन्सीले ४२ प्रकारका विशेष साइबर उपकरण प्रयोग गरी २०२३ देखि २०२४ सम्म समय प्रणालीमा घुसपैठ गर्ने प्रयाससमेत गरेको थियो। यद्यपि चीनले प्रमाण रहेको दाबी गरे पनि ती विवरण सार्वजनिक गरिएको छैन।
राष्ट्रिय समय सेवा केन्द्रले सञ्चार, वित्त, ऊर्जा, यातायात र रक्षा क्षेत्रमा समय मापन तथा वितरण सेवा प्रदान गर्दै आएको छ। मन्त्रालयले केन्द्रलाई उच्च सतर्कता अपनाउन निर्देशन दिएको जनाएको छ।
चीनले अमेरिकामाथि निरन्तर साइबर आक्रमणको आरोप लगाउँदै आफूले अरू देशहरूमा दोष थोपर्ने प्रवृत्ति देखाएको टिप्पणी गरेको छ। यसअघि पश्चिमी मुलुकहरूले चीनसँग सम्बन्धित ह्याकर समूहहरूलाई सरकारी र निजी सञ्जालमा आक्रमण गरेको आरोप लगाउँदै आएका थिए।
यो नयाँ आरोपले अमेरिका–चीनबीच व्यापार, प्रविधि र ताइवानसम्बन्धी तणाव अझ बढ्ने संकेत गरेको विश्लेषण गरिएको छ। अमेरिकी दूतावासले भने चीनको यो दाबीबारे अहिलेसम्म कुनै प्रतिक्रिया दिएको छैन।
