Writing
काठमाडौं । नेपाली कांग्रेसका नेता गोविन्द भट्टराईले पार्टीको आन्तरिक निर्वाचनमा बालकृष्ण खाँण र महालक्ष्मी उपाध्याय ‘डिना’ लगायतका नेताहरूको मिलेमतोमा आफूहरूलाई पराजित गरिएको आरोप लगाएका छन् ।
ग्लोबल टेलिभिजन एचडीसँगको कुराकानीमा भट्टराईले उम्मेदवारी मनोनयनपछि होटलमा बसेर गोप्य रूपमा टिम तयार पारिएको र सूची सार्वजनिक गरिएको दाबी गरेका हुन् ।
उनका अनुसार निर्वाचनमा अस्वाभाविक रूपमा सूची हेरफेर गरिएको थियो । उनले फर्जी मत खसालिएको आरोप लगाउँदै यस्ता गतिविधिका कारण आफूहरू पराजित हुनुपरेको जिकिर गरेका छन् ।
भट्टराईले पार्टीका नेता पूर्णबहादुर खड्काको भूमिकाबारे सोधिएको प्रश्नमा भने, ‘पूर्णजीको त्यस्तो म्यानेजमेन्ट त केही थिएन । उहाँको एउटै कुरा के थियो भने पार्टी चाहिँ कुनै पनि हालतमा फुट्नु हुन्न भन्ने थियो।’
कांग्रेसको आन्तरिक निर्वाचनमा भएको भनिएको चलखेल र फर्जी मतसम्बन्धी भट्टराईका आरोपबारे सम्बन्धित नेताहरूको प्रतिक्रिया भने यस विवरणमा समावेश छैन ।
