साउदी अरबमा उडिरहेको विमानमा सह-पाइलटको आक्रमणपछि पनि साहस र सूझबुझ देखाउँदै यात्रुहरूको ज्यान बचाएका भारतीय पाइलट स्मित मच्छरसँग भारतीय प्रधानमन्त्री नरेन्द्र मोदी ले टेलिफोनमार्फत कुराकानी गरेका छन्। मोदीले उनको साहसको प्रशंसा गर्दै शीघ्र स्वास्थ्यलाभको कामना गरेका छन्।
फ्लाईदुबईको उडान एफजेड १०७३ मा सह-पाइलटले आक्रमण गरी विमानलाई जोखिममा पार्न खोजेपछि गम्भीर घाइते भएका क्याप्टेन स्मितले कठिन अवस्थामा पनि ककपिटको ढोका खोल्न सफल भएका थिए। त्यसपछि अन्य चालक दलका सदस्य र यात्रुहरूले सह-पाइलटलाई नियन्त्रणमा लिएका थिए। विमानलाई साउदी अरबको ताबुकमा सुरक्षित अवतरण गराइएको थियो। घटनामा विमानमा सवार १७४ यात्रु सकुशल रहेका थिए।
प्रधानमन्त्री मोदीसँगको कुराकानीमा स्मितले आफू गम्भीर घाइते अवस्थामा पनि विमान तल झरिरहेको महसुस गरेपछि यात्रुहरूको ज्यान बचाउन अन्तिम प्रयास गरेको बताएका छन्। उनले त्यस कठिन समयमा आफूले हनुमान चालिसा जपिरहेको र भगवानकै कृपाले बाँचेको अनुभव सुनाएका थिए।
मोदीले भारतभरका मन्दिर तथा तीर्थस्थलमा स्मितको दीर्घायु र शीघ्र स्वास्थ्यलाभका लागि पूजा, प्रार्थना र आरती गरिएको बताए। उनले स्मितको साहसले भारतको प्रतिष्ठा बढाएको उल्लेख गर्दै साउदी अरब र यूएई सरकारलाई उपचार तथा सहयोगका लागि धन्यवादसमेत दिएका छन्।
कुराकानीका क्रममा मोदीले स्मितलाई आफूलाई आवश्यक पर्दा जुनसुकै बेला सम्पर्क गर्न सक्ने बताउँदै पूर्ण रूपमा स्वस्थ भएपछि भेट्ने इच्छा व्यक्त गरे। उनले गान्धी जयन्तीको अवसरमा स्मितले अरूको जीवन बचाएर अहिंसाको भावनालाई व्यवहारमा उतारेको पनि उल्लेख गरे।
गम्भीर घाइते भएका स्मित हाल उपचारपछि स्वास्थ्यलाभको क्रममा छन्। उनलाई थप उपचारका लागि दुबई लगिएको र उनको अवस्था स्थिर रहेको भारतीय सञ्चारमाध्यमले जनाएका छन्।
स्रोत: भारतीय प्रधानमन्त्रीको आधिकारिक वेबसाइट, रोयटर्स र द इन्डियन एक्सप्रेस
