नेपाली कांग्रेसको विशेष महाधिवेशनलाई सफल बनाउन भूमिका निर्वाह गर्दै सहमहामन्त्रीको जिम्मेवारी सम्हाल्दै आएका योगेन्द्र चौधरीलाई पुनः सहमहामन्त्रीका रूपमा अघि सार्नुपर्ने पक्षमा विभिन्न आधार प्रस्तुत गरिएको छ।
चौधरीलाई नयाँ सोच र नयाँ नेतृत्वसहित जनताको पक्षमा सशक्त कांग्रेस निर्माण गर्ने संकल्प बोकेको नेतृत्वका रूपमा प्रस्तुत गरिएको छ। पार्टीलाई आधुनिक र प्रविधिमैत्री बनाउँदै आन्तरिक लोकतन्त्रलाई मजबुत पार्ने तथा संगठनलाई थप जनउत्तरदायी बनाउने उनको प्राथमिकता रहेको बताइएको छ।
त्यस्तै, सामाजिक न्याय र समावेशिताको मुद्दालाई पनि चौधरीको राजनीतिक यात्राको महत्वपूर्ण पक्षका रूपमा अघि सारिएको छ। थारु, सीमान्तीकृत समुदाय, कमैया–कम्लहरी तथा श्रमिक वर्गको अधिकार, पुनर्स्थापना र स्वाभिमानका विषयलाई पार्टीको नीति तथा कार्यक्रममार्फत सम्बोधन गर्नुपर्ने उनको धारणा रहेको समर्थकहरूको भनाइ छ।
थारु क्लस्टरबाट सबल प्रतिनिधित्वका लागि पनि चौधरीलाई उपयुक्त उम्मेदवारका रूपमा प्रस्तुत गरिएको छ। लामो राजनीतिक अनुभव र संगठनभित्रको सक्रियताका कारण उनले थारु समुदायको आवाजलाई पार्टीको निर्णय तहसम्म प्रभावकारी रूपमा पुर्याउन सक्ने दाबी गरिएको छ।
संविधानको रक्षा, सुशासन, रोजगारी सिर्जना तथा जनजीविकाका सवाललाई प्राथमिकतामा राख्दै कांग्रेसलाई थप जनमुखी बनाउनुपर्नेमा पनि चौधरीले जोड दिँदै आएका छन्।
त्यसैगरी, वैचारिक क्षमता र राजनीतिक अनुभवलाई पार्टीको नीति निर्माणमा उपयोग गर्न सकिने आधारका रूपमा उनका समर्थकहरूले लिएका छन्। स्नातकोत्तर तहसम्मको अध्ययन तथा समाजशास्त्र र राजनीतिशास्त्रसम्बन्धी ज्ञानसँगै विद्यार्थी जीवनदेखि नै राजनीतिक तथा सामाजिक गतिविधिमा सक्रिय रहेको उनको परिचय प्रस्तुत गरिएको छ।
यसरी नयाँ सोच, आधुनिक संगठन, सामाजिक न्याय, समावेशिता, थारु समुदायको प्रतिनिधित्व, संविधानको रक्षा र सुशासनलाई केन्द्रमा राख्दै योगेन्द्र चौधरीलाई नेपाली कांग्रेसको सहमहामन्त्रीका रूपमा निरन्तरता दिनुपर्ने पक्षमा अभियान अघि बढाइएको छ।
