विश्वप्रसिद्ध फुटबल स्टार क्रिस्टियानो रोनाल्डो र उनकी लामो समयकी साथी जर्जिना रोड्रिगेज आगामी ८ अगस्टमा विवाह बन्धनमा बाँधिन सक्ने चर्चा अन्तर्राष्ट्रिय सञ्चारमाध्यमहरूमा तीव्र बनेको छ।
पोर्चुगिज सञ्चारमाध्यमका अनुसार विवाह समारोह पोर्चुगलको मडेरास्थित फन्चल क्याथेड्रलमा आयोजना हुने सम्भावना रहेको छ। समारोहका लागि नजिकै रहेको सभोय प्यालेस होटल पनि बुक गरिएको बताइएको छ। बेलायती सञ्चारमाध्यम डेली मेलले समेत उनीहरू आगामी हप्ता विवाह गर्ने तयारीमा रहेको समाचार प्रकाशित गरेको छ।
यद्यपि, रोनाल्डो वा जर्जिनाले अहिलेसम्म विवाहबारे कुनै आधिकारिक पुष्टि गरेका छैनन्, त्यसैले यी विवरणहरू हालसम्म चर्चाकै रूपमा रहेका छन्।
रोनाल्डोको जन्मभूमि मडेरा र उनको क्याथोलिक आस्थाका कारण त्यहीँको चर्चमा विवाह हुन सक्ने अनुमानलाई विशेष अर्थका साथ हेरिएको छ। यदि विवाह भयो भने, यो समारोह सीमित पारिवारिक सदस्य र नजिकका साथीभाइको उपस्थितिमा निजी रूपमा सम्पन्न हुने अपेक्षा गरिएको छ।
समारोहको अतिथि सूची, सुरक्षा व्यवस्था र अन्य विवरण भने हालसम्म गोप्य राखिएको छ।
