रामेछाप/सोलुखुम्बु — उमाकुण्ड गाउँपालिका–१ गुम्देलका ङिमा शेर्पाको जीवन हाइड्रोपावरमा श्रम गर्दागर्दै बित्यो । आफ्नै गाउँनजिकै निर्माणाधीन लिखु हाइड्रोपावरमा केही वर्ष काम गरेपछि रोजगारीका लागि उनी रसुवा पुगेका थिए । उनका दाजु दोर्जे शेर्पा पनि रसुवाको हाइड्रोपावर कम्पनीमा कार्यरत थिए ।
तर, गत भदौ १० गते भोटेकोशीमा आएको भीषण बाढीले शेर्पा परिवारलाई गहिरो शोकमा डुबायो । हाइड्रोपावर कम्पनीको कम्पाउन्डभित्र काम गरिरहेका ङिमा बाढीमा परेर बेपत्ता भए । त्यसपछि सुरु भएको परिवारको खोजी र प्रतीक्षाको पीडा झन् कहालीलाग्दो घटनामा परिणत भयो ।
छोरा बेपत्ता भएपछि ५८ वर्षीया आमा डोल्मा याङ्जी शेर्पा उनलाई खोज्दै काठमाडौँ पुगेकी थिइन् । तर, कम्पनीबाट छोरा जीवित भेटिने सम्भावना न्यून रहेको जानकारी पाएपछि उनी घर फर्किइन् ।
छोराको अवस्थाबारे आएको खबरले डोल्मा गहिरो शोकमा डुबिन् । परिवारका अनुसार उनले छोरा गुमाएको पीडा सहन निकै कठिन भइरहेको बताउने गरेकी थिइन् । ङिमाको अन्तिम संस्कार कसरी गर्ने भन्ने विषयमा उनले छोरा दोर्जे र आफन्तसँग छलफलसमेत गरेकी थिइन् ।
भदौ १६ गते रातिसम्म परिवारसँगै रहेकी डोल्मा त्यसपछि भने घरबाट बाहिरिइन् । उनले आफूले लगाएका सबै गरगहना घरमै छाडेकी थिइन् । रातिको समयमा टर्च लाइट लिएर घरबाट निस्किएकी उनी त्यसपछि परिवारको सम्पर्कमा आइनन् ।
भोलिपल्ट भदौ १७ गते बिहानैदेखि परिवार, आफन्त र स्थानीयले उनको खोजी सुरु गरे । सम्भावित स्थानमा निरन्तर खोजी गर्दा पनि तत्काल उनको अवस्था पत्ता लाग्न सकेन ।
पाँच दिनसम्मको खोजीपछि अन्ततः डोल्मा आफू बस्दै आएको स्थानभन्दा निकै टाढाको खोलामा मृत अवस्थामा फेला परिन् । उनको शव पोस्टमार्टमका लागि सोलुखुम्बुको सदरमुकाम सल्लेरी लगिएको थियो ।
डोल्मा याङ्जी उमाकुण्ड गाउँपालिका–१ गुम्देलस्थित तेछीमकी हुन् । उनी लामो समयदेखि सोलुखुम्बुको लिखुपिके गाउँपालिका–१ किन्जामा बस्दै आएकी थिइन् । सोही क्षेत्रतर्फ पर्ने खोलामा उनको शव भेटिएको हो ।
पोस्टमार्टमपछि सल्लेरीमै शेर्पा परम्पराअनुसार उनको अन्तिम संस्कार गरिएको उनका भाइ पेम्बा शेर्पाले जानकारी दिए ।
एकातिर भोटेकोशीको बाढीमा छोरा बेपत्ता, अर्कोतिर केही दिनमै आमाको पनि मृत्यु—एउटै परिवारले छोटो अवधिमा भोगेको यो दोहोरो वियोगले परिवार र आफन्तलाई स्तब्ध बनाएको छ ।
छोरा फर्किने आशामा काठमाडौँ पुगेकी आमाले छोराको अवस्था जीवित भेटिने सम्भावना न्यून रहेको खबर सुनेर घर फर्किइन् । त्यसको केही दिनमै उनी पनि परिवारबाट टाढा भइन् र अन्ततः मृत अवस्थामा भेटिइन् ।
यस घटनाले बाढीले बगाएको एउटा जीवनसँगै त्यसले परिवार र आफन्तको मनमा छाड्ने गहिरो पीडा र असर कति भयावह हुन्छ भन्ने देखाएको छ ।
