काठमाडौं । सरकारले आफ्नो कार्यकालको पहिलो ६ महिनामा भएका काम र उपलब्धिको विवरण सार्वजनिक गरेको छ। सरकारले सुशासन, सार्वजनिक सेवा, पूर्वाधार, ऊर्जा, कृषि र कूटनीतिका क्षेत्रमा भएका कामलाई मुख्य उपलब्धिका रूपमा प्रस्तुत गरेको छ।
सरकारका अनुसार यस अवधिमा मन्त्रालयको संख्या २२ बाट घटाएर १८ मा झारिएको छ। सरकारी सेवा सरल र प्रविधिमैत्री बनाउने कामलाई पनि प्राथमिकता दिइएको छ।
नागरिकता र राहदानी सेवा जुनसुकै जिल्लाबाट लिन सकिने व्यवस्था गरिएको तथा राहदानी घरमै पुर्याउने सेवा ७५ जिल्लामा विस्तार गरिएको सरकारले जनाएको छ। वैदेशिक रोजगारीको श्रम स्वीकृति पनि पूर्ण रूपमा अनलाइन बनाइएको छ।
पूर्वाधारतर्फ नागढुंगा–सुरुङमार्ग परीक्षणका रूपमा सञ्चालनमा आएको र काठमाडौं–तराई/मधेस द्रुतमार्गको भौतिक प्रगति ५० प्रतिशतभन्दा बढी पुगेको सरकारले जनाएको छ। यस अवधिमा ३५ किलोमिटरभन्दा बढी सडक कालोपत्रे, १५ सडक पुल र ४९ झोलुङ्गे पुल निर्माण भएको विवरणमा उल्लेख छ।
ऊर्जा क्षेत्रमा पछिल्लो ६ महिनामा १६१ मेगावाट विद्युत् उत्पादन क्षमता थपिएको र कुल जडित क्षमता ४ हजार २५८ मेगावाट पुगेको सरकारको दाबी छ। विद्युत् निर्यातबाट करिब १० अर्ब रुपैयाँ बराबरको विदेशी मुद्रा आम्दानी भएको पनि सरकारले जनाएको छ।
कृषितर्फ उखु किसानलाई अनुदान, कृषि तथा पशु बीमामा सहयोग र रासायनिक मल वितरणलाई उपलब्धिका रूपमा उल्लेख गरिएको छ।
यस्तै, सरकारी कार्यालयको अनुगमन, सरकारी जग्गा संरक्षण, अवैध अनलाइन सट्टेबाजी नियन्त्रण तथा विदेशमा समस्यामा परेका नेपालीको उद्धारलाई पनि सरकारले आफ्नो ६ महिनाको प्रगति विवरणमा समेटेको छ।
सरकारले सार्वजनिक गरेको यो विवरण सरकारकै मूल्यांकन र तथ्यांकमा आधारित छ। अब यी कामको प्रभाव र कार्यान्वयनले आगामी दिनमा सरकारको कार्यसम्पादनलाई थप स्पष्ट पार्नेछ।
